The Colors of Christmas

Tuesday, December 28, 2010

The Colors of Christmas

နှစ်တစ်နှစ်ရဲ့ နောက်ဆုံးလ ဖြစ်တဲ့ ဒီဇင်ဘာလဟာ တစ်ကမ္ဘာလုံးက လူတွေအတွက် အားလပ်ရက် အခါသမယပါပဲ။ ဒီ holiday season မှာပဲ ခရစ္စမတ်ပွဲတော်ကို ဆင်ယင်ကျင်းပကြသလို နှစ်ဟောင်းကုန်လို့ နှစ်သစ်ကူးမယ့် အခါသမယကိုလည်း စောင့်ကြိုကြပါတယ်။ ဒီဇင်ဘာလို့ ဆိုလိုက်တာနဲ့ နှင်းတွေ၊ အနီရောင် စင်တာကလော့တွေ၊ ရွှေရောင်သမင်ကြီးတွေကတဲ့ ရထားတွေ၊ အစိမ်းရောင်ခရစ္စမတ်သစ်ပင်တွေ၊ ရွှေရောင် ငွေရောင် ကြယ်တွေ၊ ခေါင်းလောင်းသံတွေ ကို မြင်ယောင် ကြားယောင်လာမိစေပါတယ်။ ဒါကြောင့် ဒီဇင်ဘာ သို့မဟုတ် ခရစ္စမတ်ကို အရောင်တွေပြောမယ်ဆိုရင် အနီ၊အစိမ်း၊အဖြူ၊ရွှေရောင်နဲ့ငွေရောင်တွေက မပါမဖြစ်ပါပဲ။ ဒီအရောင်တွေရဲ့ သင်္ကေတနဲ့ အနက်အဓိပ္ပာယ်တွေကလည်း သူ့ဟာနဲ့သူ စိတ်ဝင်စားစရာ ကောင်းလှတာကို တွေ့ရမှာ ဖြစ်ပါတယ်။

အဖြူရောင်

အန္တိမ အလင်းကို ကိုယ်စားပြုတဲ့ အရောင်ဆိုရင် မမှားပါဘူး။ သန့်စင်ခြင်း၊ အပြစ်ကင်းခြင်း ကိုလည်း ကိုယ်စားပြုတဲ့အပြင် တနလာင်္အရောင် လို့လည်း သတ်မှတ်ထားပါတယ်။ ရောင်စဉ် ခုနှစ်သွယ် ပေါင်းစပ် ပါဝင်နေတဲ့ အရောင်ဖြစ်လို့ သူ့ကို ပေါင်းစုခြင်း ပြည့်စုံခြင်းကို ကိုယ်စားပြုတယ်လို့လည်း ဆိုပါတယ်။

အဖြူဟာ အလင်းဖက်ကိုနွယ်တဲ့ အရောင်မို့ အဖြူများလွန်းလင်းလွန်းရင်လည်း ခေါင်းကိုက်စေတတ်သလို အလင်းသိပ်များလွန်းရင် မျက်စိကိုလည်း ထိခိုက်စေတတ်ပါတယ်။

အနောက်တိုင်းမှာတော့ အဖြူဟာ သတို့သမီးတွေအတွက် အရောင်ပါ။ အရှေ့တိုင်းမှာတော့ ဝမ်းနည်းကြေကွဲဖွယ်ရာ အသုဘ အခန်းအနားတွေမှာ သုံးကြပြန်ပါတယ်။ တချို့ယဉ်ကျေးမှုတွေမှာ အဖြူရောင်ကို တော်ဝင်တဲ့အရောင် မြင့်မြတ်တဲ့အရောင်အဖြစ် သတ်မှတ်ကြတယ်။ တချို့ယဉ်ကျေးမှုတွေမှာ ကျတော့ ပွင့်လင်းခြင်းနဲ့ အမှန်တရားကို ကိုယ်စားပြုတယ်လို့ သတ်မှတ်ကြတယ်။ ဒါကြောင့် နတ်သမီးတွေကို အဖြူရောင်အတောင်တွေနဲ့ပဲ ဖော်ပြကြလေ့ရှိပြီး ရှေးတုန်းကဆို လူကောင်းတွေက အဖြူရောင်ဝတ်စုံကို ဝတ်ဆင်ပြီး လူဆိုးတွေက အနက်ရောင်ကို ဝတ်ဆင်ကြတယ်လို့ ဆိုပါတယ်။ နိုင်ငံတော်တော်များများ မှာတော့ ဆေးရုံ ဆေးခန်းနဲ့ ဆရာဝန်တွေအတွက် အဖြူရောင်ကို အသုံးပြုတတ်ကြတာကို တွေ့ရပါလိမ့်မယ်။ အဖြူဟာ အအေးရောင် တစ်ရောင်လည်း ဖြစ်ပါတယ်။

အနီရောင်

အနီရောင်ဟာ အပူရောင်တစ်ရောင် ဖြစ်ပါတယ်။အားပြင်းတဲ့အရောင် တစ်ရောင်ဖြစ်လို့ ခံစားမှု အားပြင်းတဲ့ အချစ်မှသည် ပေါက်ကွဲမှုနဲ့ ဒေါသတွေအတိ အနီရောင်နဲ့ ကိုယ်စားပြုပါတယ်။ တကယ်တော့ အနီရောင်ဟာ မြားတစ်လက်နဲ့ ရှုပ်နေတတ်တဲ့ ကျူးပစ်လေး ဖြစ်သလို အချိန်မရွေးပေါက်ကွဲ စေတတ်တဲ့ မိစ္ဆာ တစ်ကောင်နဲ့လည်း တူပါတယ်။

လေ့လာတွေ့ရှိချက်တွေအရ အနီရောင်ဟာ အသက်ရှူနှုန်းကို မြန်ဆန်လာစေပြီး သွေးဖိအားကိုလည်း တိုးလာစေတယ်လို့ ဆိုပါတယ်။ ဘာလို့လဲ ဆိုတော့ သူက နွေးထွေးတဲ့ အရောင်တွေထဲမှာမှ အပူဆုံး အရောင်တစ်ရောင် ဖြစ်လို့ပါ။ ဒေါသထွက်လာတဲ့အခါ ပါးပြင်တွေမျက်နှာတွေ နီမြန်းလာတတ်သလို သွေးတိုး လာတဲ့အခါမှာလည်း မျက်နှာတွေ နီမြန်းလာတတ်တာကို တွေ့ဖူးကြမှာ ဖြစ်ပါတယ်။
အနီရောင်ဟာ စွမ်းအင်တစ်ခုပါပဲ။ ဒါကြောင့် လုပ်ငန်းရှင်တွေအတော်များများက အနီရောင်ကို အသုံးပြုကြပြီး celebrities နဲ့ VIP တွေအတွက် လျှောက်လမ်း ကလည်း ကော်ဇောနီလျှောက်လမ်း ( red carpet ) ဖြစ်နေတာပါပဲ။

အနီရောင် လင်းတစ်လှည့် မှိန်တလှည့် အချက်ပြမီးကတော့ အန္တရာယ်ကို ကိုယ်စားပြုသလို အရေးပေါ် အခြေအနေ တစ်ခုကိုလည်း ကိုယ်စားပြုပါတယ်။ ဒါ့အပြင် ရပ် ဆိုတဲ့ တားမြစ်ချက်သင်္ကေတတွေကိုလည်း အနီရောင်နဲ့ သုံးပါတယ်။ မီးပွိုင့်ကြီး မျက်ထောင့်နီနဲ့ စိုက်ကြည့်နေတဲ့အခါ ကားတွေ ရပ်ပေးကြရ တယ်မဟုတ်လား။
အချို့သောနိုင်ငံတွေရဲ့ ယဉ်ကျေးမှုမှာတော့ အနီရောင်ဟာ သန့်စင်မှု၊ ပျော်ရွှင်မှု နဲ့ အခန်းအနားတွေကို ကိုယ်စားပြုပါတယ်။ တရုတ်လူမျိုးတွေအတွက် ကတော့ အနီရောင်ဟာ ကံကောင်းခြင်းကို သယ်ဆောင်လာတဲ့အရောင်၊ ပျော်ရွှင်မှုနဲ့ ကြွယ်ဝမှုကို ကိုယ်စားပြုတဲ့ အရောင် ဖြစ်ပါတယ်။ ဒါကြောင့် သူတို့ လက်ဆောင်တွေ ဘာတွေပေးတဲ့အခါ ဆိုရင်လည်း အနီရောင် စက္ကူနဲ့ ပတ်ပြီး ပေးတတ်ကြပါတယ်။ အဆိုးဖက်က ဆိုရင်တော့ တရုတ်တွေဟာ သူတို့ မိသားစုထဲက သေဆုံးသွားတဲ့သူ သို့မဟုတ် သေပြီ လို့ သတ်မှတ်လိုက်တဲ့ သူတွေရဲ့ နာမည်ကိုလည်း အနီရောင် မှင်နဲ့ ရေးလေ့ရှိတယ်လို့ ဆိုပါတယ်။ ဒါ့အပြင် ယင် နဲ့ ယမ် မှာ ဆိုရင်လည်း အနီဟာ အခြေပြုမှုပေါ်မူတည်ပြီ နှစ်မျိုးလုံးနဲ့ ဆက်စပ်နေတယ်လို့ ဆိုပါတယ်။
အရှေ့တိုင်းက တရုတ်၊ ဗီယက်နမ်၊ အိန္ဒိယ စတဲ့ နိုင်ငံတွေက သတို့သမီးအများစုဟာ အနီရောင်ကို မင်္ဂလာအရောင်အဖြစ် ဆင်မြန်းတတ်ကြပေမယ့် အာဖရိကမှာတော့ အနီရောင်ဟာ ပူဆွေးမှုနဲ့ ဆက်ဆိုင်တဲ့ အရောင်ဖြစ်ပါတယ်။
ရုရှားနိုင်ငံမှာ ဗော်ရှီဗစ်တွေက သူတို့အလံကို အနီရောင်အဖြစ်အသုံးပြုကြတဲ့အတွက် အနီရောင်ဟာ ကွန်မြူနစ်တွေနဲ့ ပတ်သက်နေတဲ့ အရောင် တစ်ရောင် လည်း ဖြစ်ပါတယ်။ တချို့တွေကဆို ကွန်မြူနစ်တွေကို အနီတွေ လို့လည်း ခေါ်ကြပါတယ်။ ဒါ့အပြင် နိုင်ငံအများစုရဲ့ အလံမှာလည်း အနီရောင် ပါဝင်နေတာ ကိုသတိထားမိပါတယ်။ အနီရောင် ပတ္တမြားကိုတော့ နှစ်လေးဆယ်မြောက် မင်္ဂလာ အထိမ်းအမှတ် လက်ဆောင် အဖြစ်အသုံးပြုကြပါတယ်။

အနီရောင်ကို အာရုံစူးစိုက်ခံရမှု အတွက် အသုံးပြုကြပါတယ်။ အနောက်ဖက် နောက်ခံအရောင်နဲ့ ရောထွေးမသွားချင်တဲ့အခါ အနီရောင်ကို သုံးပါတယ်။ အရှိန်လျှော့ပါ ဆိုတဲ့ သတိပေးချက် စကားလုံးတွေကို အနီနဲ့ သုံးတတ်ကြသလို အန္တရာယ်ကွေ့ ဆိုတဲ့ နေရာတွေမှာလည်း အနီရောင်ကို သုံးပါတယ်။ အနီရောင် လေးတစ်စက်ကလည်း အဓိပ္ပာယ် အများကြီး ဆောင်ပါတယ်။ တစ်ခါတစ်ရံမှာ အနည်းငယ်သော အနီစက်လေးတွေက အများကြီးထက် ပိုပြီး အဓိပ္ပာယ် လေးနက်ပါတယ်။
အနီရောင်ကို တခြားအရောင်တွေနဲ့ တွဲစပ်ရတာ လိုက်ဖက်ဖို့ ခက်ခဲတတ်ပေမယ့် အစိမ်းရောင်နဲ့ တွဲဖက်လိုက်ရင်တော့ ဒါဟာ ခရစ္စမတ် အရောင် ဖြစ်သွားပြီး ပျော်ရွှင်မှုကို ကိုယ်စားပြုသွားတာကို တွေ့ရပါတယ်။
မြင်တွေ့နေကျ စာပိုဒ်တွေမှာ တချို့ စာကြောင်းတွေ စာလုံးတွေကို အနီရောင်နဲ့ ပြသတာဟာ ပိုမို လေးနက်စေချင်လို့ ဖြစ်ပါတယ်။ မနက်ခင်းရဲ့ အနီရောင်ကောင်းကင်ဟာ သဘောင်္သားတွေအတွက် သတိပေးချက်အရောင်ဖြစ်ပြီး ညဖက် အနီရောင်ကောင်းကင်ကတော့ သဘောင်္သားတွေအတွက် စိတ်ချမ်းမြေ့စေတဲ့ အရောင်ပဲ ဖြစ်ပါတယ်။

တစ်ခါတစ်ရံမှာတော့ အနီရောင်ဟာ အပြစ်၊ အပြစ်မကင်းမှု နဲ့ ဒေါသတွေရဲ့ သင်္ကေတ ဖြစ်နေတတ်ပါတယ်။ ကျမ်းစာထဲမှာတောင် သင့်အပြစ်များသည် သွေးကဲ့သို့ နီမောင်းသော်လည်း .. ဆိုတဲ့ စကားကို တွေ့ကြရပါတယ်။ ဒါပေမယ့် အနီရောင် နှင်းဆီတစ်ပွင့်ကတော့ အချစ်ရဲ့ သင်္ကေတဖြစ်ပါတယ်။ ဂရိနဲ့ ဟီဘရူးတွေကတော့ အနီရောင်ကို အချစ်ရဲ့ သင်္ကေတအရောင်လို့ သတ်မှတ်သလို သတ္တိနဲ့ စွန့်လွှတ်စတေးတဲ့ အရောင် အဖြစ်လည်း သတ်မှတ်ထား ပါတယ်။ စိတ်ပညာရှင်များရဲ့ လေ့လာတွေ့ရှိချက်တစ်ခုအရကတော့ အမျိုးသားတွေဟာ အနီရောင် ၀တ်ဆင်ထားတဲ့ အမျိုးသမီးတွေကို ပိုပြီး ဆွဲဆောင်မှု ရှိတယ်လို့ ထင်တတ်ကြပါတယ်တဲ့။

ရောမဒဏ္ဍာရီမှာတော့ အနီရောင်ဟာ စစ်ပွဲဆိုင်ရာ နတ်ဘုရား ( god of war, Mars ) နဲ့ ဆက်စပ်နေတယ်လို့ ဆိုပါတယ်။ ရောမတွေက အောင်ပွဲခံတဲ့အခါ တစ်ကိုယ်လုံးကို အနီရောင်ခြယ်ပြီး အဲဒီအောင်ပွဲ အတွက် ချီးမြှောက်မှုကို လက်ခံတတ်ကြတယ်တယ်လို့လည်း ဆိုပါတယ်။ အက်ဒ၀ပ် ဒီဘိုးနိုးရဲ့ ဦးထုပ်ခြောက်လုံး စဉ်းစားတွေးခေါ်မှု စာအုပ်မှာ အနီရောင်ဦးထုပ်ဟာ ခံစားချက်ကို ကိုယ်စားပြုပါတယ်။ ဒါ့အပြင် အနီရောင်ကို ရွှေရောင်နဲ့ ပေါင်းစပ်တဲ့အခါ မှာတော့ သတ္တိကို ကိုယ်စားပြုတယ်လို့ဆိုပါတယ်။ ဟယ်ရီပေါ်တာ ဇာတ်လမ်းတွဲတွေထဲက ဟော့က၀ပ်ကျောင်းတော်ကြီးရဲ့ ဂရစ်ဖင်ဒေါလ် အဆောင်ရဲ့ သင်္ကေတဟာ အနီနဲ့ ရွှေရောင် ဖြစ်ပါတယ်။

အစိမ်းရောင်

အစိမ်းရောင်ကတော့ အသက်ဓာတ်နဲ့ သက်ဆိုင်တဲ့ အရောင်ပါပဲ။ သဘာဝမှာကိုက ရှင်သန်မှု အတော်များများကို အစိမ်းရောင်တွေနဲ့ တွေ့ကြရမှာ ဖြစ်ပါတယ်။ တခြားတစ်ဖက်က ကြည့်မယ်ဆိုရင်တော့ အစိမ်းရောင်ဟာ မနာလိုဝန်တိုမှု ကြီးတဲ့အရောင်လို့ သိရပါတယ်။ ဒါကြောင့် မနာလိုစိတ်ကြီးသူတွေကို GREEN-EYED MONSTER လို့ ခေါ်ကြတာပါ။ နောက် အတွေ့အကြုံမရင့်သေးတဲ့ သူတွေကိုလည်း အစ်ိမ်းရောင်နဲ့ ကိုယ်စားပြုတတ်ကြပါသေးတယ်။

အစိမ်းရောင်ဟာ ငြိမ်သက်တဲ့ အရောင်တစ်ရောင် ဖြစ်ပါတယ်။ အပြာလိုပဲ သူ့မှာ တည်ငြိမ်အေးချမ်းတဲ့ ခံစားမှုတွေ ပေးစွမ်းနိုင်ပါတယ်။ ဒါကြောင့် အပြာရောင်အခန်းနဲ့ အစိမ်းရောင် အခန်းတွေထဲမှာ နေရရင် အချိန်ကုန်မြန်တယ်လို့ ထင်ရစေပါတယ်။

အစိမ်းရောင်ဟာ အိုင်ယာလန်ပြည်ရဲ့ အရောင်ဖြစ်ပြီး အစ္စလာမ်တွေနဲ့လည်း ပတ်သက်တဲ့ အရောင်တစ်ရောင် ဖြစ်ပါတယ်။ သဘာဝမှာတွေ့ရတတ်တဲ့ အစိမ်းရောင်အရ အစိမ်းကို ဆောင်းနှောင်းရဲ့ သင်္ကေတ အဖြစ်လည်း အသုံးပြုကြပါတယ်။ အနီရောင်နဲ့ တွဲဖက်လိုက်မယ် ဆိုရင်တော့ ဒါဟာ ခရစ္စမတ် အရောင်ပါပဲ။

အစိမ်းရောင်ကို နွေးထွေးသွားစေလိုမှု အတွက်ရော အေးမြသွားစေလိုမှု အတွက်ရော သုံးပါတယ်။ ဘာလို့လဲ ဆိုတော့ အစိမ်းရဲ့ သဘောတရားကိုက သမ မျှတ ညီညွတ် တည်ငြိမ် သွားစေတဲ့ သဘောမို့ပါ။ အစိမ်းကို အပြာနဲ့တွဲစပ်လိုက်ရင် သဘာဝရဲ့ ပဲ့တင်သံကို ရပါတယ်။ ရေနဲ့တောတောင်တွေ အတွဲအစပ်က အသစ် စတင်ခြင်းနဲ့ ရှင်သန်ကြီးထွားခြင်းကို ကိုယ်စားပြုသလိုပေါ့။

အစိမ်းနဲ့အဝါ၊အနက် သို့မဟုတ် အစိမ်းနဲ့ အဝါ၊အဖြူ သုံးရောင်တွဲဟာ အားကစားအရောင် ဖြစ်ပါတယ်။ အစိမ်းနဲ့ ခရမ်းအတွဲဟာ အမြင့်ဆုံး ဆန့်ကျင်ဖက် အရောင်နှစ်ခုကို တွဲစပ်လိုက်တာပါပဲ။ ဒါပေမယ့် တကယ်ကို အသက်ဝင်ပါတယ်။ အစိမ်းနဲ့ အဝါ၊ လိမ္မော် အတွဲအစပ်ကတော့ သစ်သီးရောင်တွေကို ခံစားလို့ ရစေပါတယ်။

အနီရောင်မီးဟာ ဟန့်တား ပိတ်ပင်မှု ဆိုရင် အစိမ်းရောင်မီးဟာ ခွင့်ပြု လိုက်လျောမှု လို့ အဓိပ္ပာယ်ရပါတယ်။ သီရေတာတွေ ရုပ်ရှင်ပြခန်း တီဗီကြည့်တဲ့အခန်းတွေကို အစိမ်းရောင်ထားမယ်ဆိုရင် ကြည့်သူတွေကို ပိုပြီး သက်သောင့်သက်သာဖြစ်စေပါတယ်။ အစိမ်းရောင်ဟာ ငွေကြေးကိုလည်း ကိုယ်စားပြုတာမို့ GREEN BACK ဆိုတာ အမေရိကန်ဒေါ်လာကို ခေါ်တာလို့ ဆိုပါတယ်။ ပိုပြီး ကောင်းမွန်တဲ့ တိုးတက်မယ့် နေရာကို ရွှေ့ပြောင်းသွားတဲ့သူတွေကို ပိုစိမ်းတဲ့စားကျက်ရှိရာ သွားတယ်လို့ ဆိုပါတယ်။ ဒါကတော့ ကျမ်းစာထဲက စိမ်းလန်းသောကျက်စားရာအရပ် ဆိုတဲ့ စကားလုံးက လာတာဖြစ်ပုံရပါတယ်။

တကယ်တော့ အစိမ်းဟာ သဘာဝတရားရဲ့အရောင်၊ အသက်ဓာတ်ရဲ့ အရောင် ဖြစ်ပါတယ်။ မြက်ခင်းစိမ်း စိမ်းရဲ့ အရောင်ဟာ ဟာပိုပြီး တည်ငြိမ်တဲ့ အရောင်လို့ ဆိုနိုင်ပါတယ်။ဒါ့အပြင် အစိမ်းဟာ ကိုယ့်ကိုယ်ကို လေးစားခြင်းနဲ့ ကောင်းမွန်စွာ ရှင်သန်နေထိုင်ခြင်း ရဲ့ သင်္ကေတလည်း ဖြစ်ပါတယ်။ သင်ကြားခြင်း၊ အစပြုခြင်းနဲ့လည်း ဆက်စပ်နေတဲ့အတွက် တချို့ကျောင်းတွေရဲ့ ဝတ်စုံက အစိမ်းရောင် ဖြစ်နေတာ တွေ့ဖူးမှာပါ။ အစိမ်းရောင်ဟာ စိတ်ချရတဲ့ အရောင်တစ်ရောင် ဖြစ်တဲ့အတွက် တစ်ခုခုနဲ့ပတ်သက်ပြီး ဘာအရောင်သုံးရမလဲမသိများ ဖြစ်နေရင် အစိမ်းရောင်ကိုသာ စိတ်ချလက်ချ ရွေးချယ်လိုက်ပါ။

အစိမ်းရောင်ဟာ အေးမြတယ်လို့ ဆိုတဲ့အတွက် မျက်စိတွေညောင်းညာလာရင် မြက်ခင်းစိမ်း သစ်တောစိမ်း နံရံစိမ်းတွေကို ကြည့်ခိုင်းတတ်ကြပါတယ်။ ရှေးဟောင်း အီဂျစ်တွေကတော့ အစိမ်းရောင် မျက်လုံးချယ်တဲ့ လိုင်နာကို အသုံးပြုကြပါတယ်။ ကျန်းမာရေးအတွက်ဆိုရင် အစိမ်းရောင် လတ်လတ်ဆတ်ဆတ် ဟင်းရွက်တွေကို ဒီတိုင်း အစိမ်းစားကြရပါတယ်။ နေ့တွေထဲမှာတော့ သောကြာနေ့ဟာ အစိမ်းရောင်ကို ကိုယ်စားပြုပြီး အာရှမှာတော့ (အထူးသဖြင့် တရုတ်) အစိမ်းရောင် ကျောက်စိမ်းကို သန့်စင်တဲ့ကျောက် တစ်မျိုးအဖြစ် ဆောင်တတ်ကြပါတယ်။

သင့်ဘဝမှာ ..

(၁) မျှတ သင့်တင့်တဲ့ အခြေအနေသစ်ကို အလိုရှိနေတယ်ဆိုရင်

(၂) အပြောင်းအလဲ တစ်ခုခု တိုးတက်မှု တစ်ခုခုကို လိုအပ်နေတယ်လို့ ခံစားရရင်

(၃) အတွေးအကြံအသစ်တွေကို လွတ်လပ်စွာ တွေးဖို့ဆိုရင်

(၄) ကြောက်စိတ်တွေ စိုးရိမ်သောကတွေကို ကာကွယ်ဖို့ အတွက်ဆိုရင်

.. အစိမ်းရောင်တွေ လိုအပ်နေပါပြီ။ အစိမ်းရောင် အခန်း၊ အစိမ်းရောင် အဝတ်အထည်၊ အသုံးအဆောင် တွေကို ပြောင်းလဲလိုက်မယ်ဆိုရင် သင့်ဘဝမှာ လိုအပ်မှုတွေ ပြည့်စုံလာလိမ့်မယ်လို့ ဆိုပါတယ်။

အစိမ်းရောင် (green) ဆိုတဲ့ စကားလုံးဟာ ရှေးဟောင်း အင်္ဂလိပ်စကားလုံး gren’ne ( old English verb : growan) ဆိုတာနဲ့ အနီးစပ်ဆုံး ဆက်စပ်နေပြီး အဲဒါက “ to grow” လို့ အဓိပ္ပာယ်ရပါတယ်တဲ့။ ပြီးတော့ အဲဒီအရောင်ကို သမုဒ္ဒရာတွေနဲ့ အပင်တွေကို ဖော်ညွှန်းဖို့ အသုံးပြုခဲ့ကြတယ်။ green လို့ သတ်မှတ်လိုက်တဲ့ အစ်ိမ်းရောင်ကို အင်္ဂလိပ်တွေကပဲ ၇၀၀ရာစုနှစ်လောက်က စတင်သုံးစွဲခဲ့ကြတာဖြစ်ပါတယ်။

နိုင်ငံအမျိုးမျိုး ဒေသ အမျိုးမျိုး ၊ ယဉ်ကျေးမှု အမျိုးမျိုး ရှိတဲ့အတွက် အစိမ်းရောင်ကို သတ်မှတ်ချက်လည်း မတူကြပါဘူး။ တချို့တွေက မျှော်လင့်ချက်၊ ရှင်သန်ခြင်း စသဖြင့်အကောင်းဖက်က သတ်မှတ်ကြသလို တချို့ကလည်း သေခြင်းတရား၊နာမကျန်းမှု၊ မနာလိုမှု နဲ့ မိစ္ဆာတွေကို အစိမ်းရောင်နဲ့ ကိုယ်စားပြုကြပြန် ပါတယ်။ ရှေးဟောင်းအီဂျစ်တွေရဲ့ နတ်ဘုရား အိုဆီးရစ်ကို သရုပ်ဖော်တဲ့အခါ သူ့ရဲ့ အရေပြားကို အစိမ်းရောင်နဲ့ ဖော်ပြကြသလို မင်းသား Bela Lugosi ဒရက်ကူလာအဖြစ် သရုပ်ဆောင်တဲ့အခါ မိတ်ကပ်ကို အစိမ်းရောင်သန်းနေအောင် ပြင်ဆင်ထားတာကိုလည်း တွေ့ခဲ့ဖူးပါတယ်။ အစိမ်းကို အနီနဲ့ တွဲစပ်လိုက်တဲ့ အခါ ပျော်ရွှင်ဖွယ်အရောင်တွဲ ကိုရနိုင်ပေမယ့် အစိမ်းကို ရွှေရောင်နဲ့ တွဲစပ်လိုက်တာဟာ လူငယ်ဘဝ ကုန်ဆုံးခြင်းလို့ အဓိပ္ပာယ်ရပါသတဲ့။

ဒါ့အပြင် အစိမ်းရောင် ဝတ်ဆင်ခြင်းကို ယုံကြည်မှု အလိုက် ရှောင်တဲ့သူတွေလည်း ရှိပါတယ်။ ဒီ မြန်မာနိုင်ငံ မှာလည်း အနီနဲ့အနက်တွဲမဝတ်ရဘူး ဆိုတာမျိုး၊ အနက်နဲ့အစိမ်း တို့ အစိမ်းဝမ်းဆက်တို့ မဝတ်ရဘူးဆိုတဲ့ အယူတွေလည်း ရှိတာ တွေ့ဖူးပါတယ်။ အဲဒီလိုပဲ ဆဲလ်တစ် တွေကလည်း အစိမ်းရောင်ကို ရှောင်ကျဉ်ပါတယ်။ ဘာလို့လဲ ဆိုတော့ မကောင်းတဲ့ ကံတွေ ၊သေခြင်းတရားနဲ့ ဆက်ဆိုင်တဲ့ ကံတွေ ရောက်လာမှာစိုးလို့ လို့ ဆိုပါတယ်။ နောက်ထပ် အစိမ်းရောင်ကို အယူသီးတဲ့သူတွေကတော့ အစိမ်းရောင်ကို နာမပြုစတင်သုံးစွဲခဲ့တဲ့ အင်္ဂလိပ်တွေပဲ ဖြစ်ပါတယ်။ သူတို့က အစိမ်းရောင်ကား၊ အစိမ်းရောင် သတို့သမီးဝတ်စုံ၊ အစိမ်းရောင် ဇာတ်ပွဲဝတ်စုံ စတာတွေနဲ့ ပတ်သက်ပြီး တစ်ဖက်စွန်းရောက်တဲ့ အယူသီးတတ်ကြပါတယ်။

ရွှေရောင်

ရွှေရောင်ဟာ အဝါရောင်၊ လိမ္မော်ရောင်၊ အညိုရောင်တို့ရဲ့ တစ်ဝမ်းကွဲ မောင်နှမ တော်စပ်တဲ့ အရောင်ပါ။ အစိမ်းရောင်ကို ငွေကြေးအရောင်လို့ သတ်မှတ်ကြသလို ရွှေရောင်ကလည်း ကြွယ်ဝမှုနဲ့ ခန်းနားကြီကျယ်မှု ကို ကိုယ်စားပြုပါတယ်။

ရွှေရောင်ဟာ အဝါကနေဆင်းသက်လာတာ ဖြစ်ပြီး အဝါလိုပဲ သူကလည်း နွေးထွေးတဲ့ အရောင်တစ်ရောင် ဖြစ်ပါတယ်။ အလင်းနဲ့ ပျော်ရွှင်မှုကို ပေးစွမ်းနိုင်စွမ်းပြီး ရိုးရာယဉ်ကျေးမှုတွေနဲ့လည်း ဆက်နွယ်နေပါတယ်။ ရွှေဟာ အဖိုးတန်တဲ့ သတ္တုတစ်မျိုး ဖြစ်တဲ့အတွက် ရွှေရောင်ဟာလည်း ဓနနဲ့ ကြွယ်ဝမှုတွေနဲ့ ဆက်စပ်နေပါတယ်။ ဝါဝါမြင်တိုင်း ရွှေမဟုတ်ဘူးဆိုတဲ့ ဆိုရိုးစကားရှိပေမယ့် ရွှေရောင်တိုင်းကတော့ ကြွယ်ဝမှုနဲ့ ဥစ္စာကို ရည်ညွှန်းတတ်ပါတယ်။ ဒါ့အပြင် ရွှေဟာ နှစ်ငါးဆယ်ပြည့် မင်္ဂလာနေ့အတွက် အထိမ်းအမှတ် လက်ဆောင်လည်း ဖြစ်ပါတယ်။ ရွှေရောင်ပေါက်နေတဲ့ ကြေးကတော့ (၈)နှစ်မြောက် မင်္ဂလာနေ့ အထိမ်းအမှတ်လက်ဆောင်ဖြစ်ပြီး အနီဖက်သန်းတဲ့ ရွှေရောင်ပေါက်နေတဲ့ ကြေးကတော့ (၇)နှစ်မြောက် အထ်ိမ်းအမှတ်လက်ဆောင်ဖြစ်ပါတယ်။

ဆိုင်းဘုတ်တွေ စာလုံးတွေ ပုံတွေ သင်္ကေတတွေ စသဖြင့်မှာ ရွှေမှင် အနည်းငယ်လောက် ထည့်သွင်း လိုက်တာဟာ ကြွယ်ဝမှုကို ဖော်ဆောင်တာ ဖြစ်ပါတယ်။ ရွှေရောင်ဟာ လိမ္မော်ရောင်၊ အစိမ်းရောင်၊ အညိုရောင် တွေနဲ့ လိုက်ဖက်ပါတယ်။ အနီတို့ ခရမ်းတို့နဲ့ကျတော့ အနည်းငယ် လက်တောက်နေတဲ့ ရွှေရောင်နဲ့ တွဲဖက်ကြလေ့ရှိပါတယ်။

မြန်မာလူမျိုးတွေဟာ သူတို့ကိုယ်သူတို့ ရွှေ လို့ ညွှန်းဆိုတတ်ကြပါတယ်။ ဘာလို့လဲ ဆိုတော့ ရွှေကဲ့သို့ ကောင်းမွန်သော၊ တန်ဖိုးရှိသော၊ ရွှေအဆင့်အတန်း စတဲ့ စကားလုံးတွေနဲ့ ထပ်တူပြုပြီး ညွှန်းဆိုကြတာ ဖြစ်ပါတယ်။ တကယ့်တကယ်ကျ ရွှေရောင်ဟာ ကြွယ်ဝမှု တစ်ခုတည်းကို ကိုယ်စားပြုတာမဟုတ်ပါဘူး။ ကျန်းမာရေး ကောင်းမွန်မှုကိုလည်း ရွှေရောင်နဲ့ ပြဆိုတတ်ကြပါတယ်။ ရွှေရောင်ကို နှစ်သက်တတ်သူတွေက အကောင်းမြင်ဝါဒ သမားတွေ ဖြစ်တတ်ပါတယ်။

တိဗက် ဗုဒ္ဓဘာသာတွေ ရဲ့ အထွဋ်အမြတ်ထားတဲ့ ရတနာ ငါးခု ရှိပါတယ်။ တစ်ခုက အလင်းကို ကိုယ်စားပြုတဲ့ သလင်းကျောက် ဖြစ်ပါတယ်။ ဒုတိယ တစ်ခုက အဆုံးမရှိတဲ့ ပင်လယ်နဲ့ ကောင်းကင်ကို ကိုယ်စားပြုတဲ့ တာကွိုက်စ်( turquoise ) ဖြစ်ပြီး တတိယ တစ်ခုကတော့ နေရဲ့ လင်းရောင်ခြည်ကို ကိုယ်စားပြုတဲ့ ရွှေပါပဲ။ စတုတ္ထ တစ်ခုက အသက်ဓာတ်နဲ့ ပုံသဏ္ဍန်ကို ကိုယ်စားပြုတဲ့ သန္တာကျောက် ဖြစ်ပြီး ပဉ္စမ တစ်ခုကတော့ လရောင်ခြည်ကို ကိုယ်စားပြုတဲ့ ငွေ ဖြစ်ပါတယ်။

သင့်ဘဝမှာ ..

(၁) ကိုယ်ပိုင်အစွမ်းအစတွေကို တိုးမြှင့်ချင်တယ်ဆိုရင်

(၂) သက်သောင့်သက်သာနဲ့ ဘဝကို ဖြတ်သန်းပျော်ရွှင်ချင်တယ်ဆိုရင်

(၃) ကျန်းမာရေးကောင်းမွန် ချင်တယ်ဆိုရင်

(၄) အောင်မြင်မှုတွေ လိုအပ်တယ်ဆိုရင် ..

သင့်အသုံးအဆောင်တွေနဲ့ ပတ်ဝန်းကျင်မှာ ရွှေရောင်တွေကို ဖြည့်စွက်ပေးလိုက်ပါ။ ရွှေကို နေ့စဉ် ဆင်ယင် ဝတ်ဆင်သူဟာ သူ့ရဲ့ ပါဝါကို တိုးမြင့်စေပါတယ်။ သတ္တိကို ကောင်းစေသလို ကိုယ့်ရဲ့ စိတ်စွမ်းအင်နဲ့ ကိုယ့်ကိုယ်ကို ယုံကြည်မှုကိုလည်း တိုးစေတယ်လို့ ဆိုပါတယ်။ ရွှေဆွဲကြိုးကို လည်ပင်းမှာ ဆွဲထားတာဟာ ကျန်းမာရေးကို တိုးတက်ကောင်းမွန်စေပါတယ်။

ငွေရောင်

ငွေရောင်ကတော့ အေးမြတဲ့ အရောင်ထဲမှာ ပါပါတယ်။ မီးခိုးရောင်နဲ့ ဆင်တယ်လို့ ဆိုပေမယ့် သူက ပိုပြီး သက်ဝင် လှပပါတယ်။ ငွေဟာလည်း အဖိုးတန် သတ္ထု တစ်မျိုး ဖြစ်တဲ့အတွက် ရွှေလောက်မဟုတ်ပေမယ့် သူကလည်း ကြွယ်ဝမှုကို ကိုယ်စားပြုတဲ့ ဒုတိယ အရောင်တစ်ရောင် ဖြစ်ပါတယ်။ ဒါပေမယ့် ငွေရောင်က ရွှေရောင်ထက် ပိုပြီး တည်ငြိမ်တဲ့အပြင် ထူးခြားမှုလည်း ရှိပါတယ်။ ငွေရောင် ဆံပင်ဖြူတွေ လွှမ်းနေတဲ့ သက်ကြီးရွယ်အိုတွေကို ကြည့်မယ်ဆိုရင် အဲဒီ တည်ငြိမ်မှုကို တွေ့မြင် ခံစားနိုင်မှာ ဖြစ်ပါတယ်။ ရွှေဟာ နှစ်ငါးဆယ်မြောက် မင်္ဂလာ အထိမ်အမှတ် လက်ဆောင်ဖြစ်သလို ငွေကလည်း နှစ်ဆယ့်ငါးနှစ်မြောက် မင်္ဂလာ အထိမ်းအမှတ် လက်ဆောင်ဖြစ်ပါတယ်။

ငွေရောင်ဟာ ကမ္ဘာမြေနဲ့ ပိုနီးစပ်ပြီး သဘာဝကျပါတဲ့အပြင် ကျက်သရေလည်း ရှိပြီးတင့်တယ် ပါတယ်။ ငွေရောင်ဟာ တိုးတက်တဲ့ နည်းပညာတွေနဲ့ စက်ရုံတွေကိုလည်း ကိုယ်စားပြုတဲ့အတွက် စက်ရုံကြီးတွေ တော်တော်များများကို သတ္တုရောင် တလက်လက်နဲ့ တွေ့ရမှာ ဖြစ်ပါတယ်။ တာကွိုက်စ်နဲ့ ငွေရောင် ရောစပ်မှုကတော့ အမေရိကန် အနောက်တောင်ဒေသကို ဖော်ညွှန်းတယ်လို့ ဆိုပါတယ်။

ရှေးတုန်းက ငွေကြေး သုံးစွဲမှုကို ငွေနဲ့ပြုလုပ်ထားတဲ့ ဒင်္ဂါးတွေ သုံးစွဲခဲ့ကြတဲ့အတွက် ငွေကြေးကို တချို့က ငွေစ လို့ ခေါ်ကြသလို ငွေရောင်ဖန်သားပြင် ဆိုတာဟာလည်း ရုပ်ရှင် အထူးသဖြင့် ခေတ်ဟောင်း ရုပ်ရှင် ကို ဖော်ညွှန်းတဲ့ စကားလုံး ဖြစ်ပါတယ်။ ရွှေလင်ဗန်းနဲ့ အချင်း ဆေးတယ် ဆိုတဲ့ စကားပုံ ရှိသလို ငွေဇွန်း ကိုက်ပြီး မွေးလာတဲ့သူ ဆိုတဲ့ ဆိုရိုးစကားလည်း ရှိပါတယ်။ ကံတရားအရ မွေးကတည်းက ကံကောင်းသူ တွေလို့ ဆိုလိုတာ ဖြစ်ပါတယ်။

ငွေရောင်ဟာ စိတ်ကူးစိတ်သန်း၊ အာရုံမြင်မှု နဲ့ အလိုအလျောက်သိမြင်မှုတွေကိုလည်း ကိုယ်စားပြုပါတယ်။ ရိုးရာအရကတော့ ငွေရောင်ဟာ လရဲ့ စွမ်းအင်ကို ကိုယ်စားပြုပါတယ်။ ( တိဗက်ဗုဒ္ဓဘာသာတွေကလည်း ဒီလိုပဲ သတ်မှတ်ထားပါတယ်။) ဒါ့အပြင် ငွေရောင်ရဲ့ အဓိပ္ပာယ်ဟာ လျို့ဝှက်ဆန်းကျယ်မှုတွေနဲ့ ဆက်နွယ် နေပြီး မိန်းမဆန်တဲ့ စွမ်းအင်နဲ့လည်း ဆက်နွယ်နေပါတယ်။

ငွေရောင်ဟာ ထူးခြားမှု ရှိတဲ့ အရောင်တစ်ရောင်ဖြစ်ပြီး ရွှေရောင်နဲ့ တွဲစပ်လိုက်တဲ့အခါ ကြွယ်ဝမှုနဲ့ ဥစ္စာဓနကို ကိုယ်စားပြုသွားပါတယ်။ ရွှေရောင်က နေရောင်ခြည်နဲ့ ဆက်စပ်နေပြီး အဖိုဓာတ်ကို ကိုယ်စားပြုပေမယ့် ငွေရောင်ကတော့ လရောင်နဲ့ ဆက်စပ်နေတာမို့ အေးမြတဲ့ အမဓာတ်ကို ကိုယ်စားပြုပါတယ်။

ငွေရောင်ဟာ healing လုပ်တဲ့ နေရာမှာ အံ့သြစရာကောင်းလောက်အောင် လိုအပ်ပြီး ကျန်းမာရေးကို မြှင့်တင်ပေး နိုင်တဲ့ အဖိုးတန် သတ္တုတစ်မျိုး ဖြစ်ပါတယ်။ သူက မျှတတဲ့ အာရုံခံစားမှုကို ပေးပြီး စိတ်ပိုင်းဆိုင်ရာ ခံစားမှုပိုင်းဆိုင်ရာ တွေမှာ အထောက်အကူ ပြုတဲ့အပြင် ရုပ်ပိုင်းဆိုင်ရာ သန့်စင် ခြင်းနဲ့ စွန့်ထုတ်ခြင်းတွေမှာလည်း အထောက်အကူပြုပါတယ်။ အရောင်ကုထုံးမှာ ဆိုရင် ငွေရောင်ကုထုံးဟာ မိန်းမတွေရဲ့ ရာသီနဲ့ပတ်သက်တဲ့ နာကျင်မှုကို သက်သာစေပြီး ဟိုမုန်းကို မျှတအောင် ထိန်းပေးနိုင်တဲ့အပြင် ရင်သားကိုလည်း နူးညံ့စေတယ်လို့ ဆိုပါတယ်။

ငွေရောင် အကျီ င်္တွေဝတ်ဆင်တာ၊ အိမ်ကို ငွေရောင်တွေ ငွေထည်တွေနဲ့ ဆင်ယင် သုံးစွဲတာဟာ ငြိမ်သက်ခြင်းကို ရရှိစေပြီး အသက်တာမှာ မျှတတဲ့ ဓာတ်တွေကို ရရှိစေတယ်လို့ ဆိုကြပါတယ်။ ဒါ့အပြင် ငွေရောင်ဟာ အလိုအလျောက်သိမြင်မှုနဲ့ အတွေးအာရုံတွေကို ထက်သန်စေတဲ့အတွက် တစ်စုံတစ်ခု အတွက် အမှန်ကိုရရှိဖို့ လိုအပ်လာပြီဆိုရင် ငွေရောင်ကို ဝတ်ဆင် စဉ်းစားတွေးတော သင့်တယ် လို့ ဆိုပါတယ်။ အကယ်၍ အသက်တာမှာ အမှန်တရားကို ပိုပြီး တောင့်တလာတယ်၊ ရိုးဖြောင့်မှုကို ငတ်မွတ် လာတယ် ၊ တစ်စုံတစ်ရာကို ပိုမို ရှင်းလင်းစွာ သိနားလည်ဖို့ လိုအပ်လာတယ်ဆိုရင် သင့်ဘဝထဲကို ငွေရောင် တချို့ ဖြည့်စွက်လိုက်ပါ။

ငွေရောင်ကို နှစ်သက်တဲ့ သူတွေဟာ အာရုံခံစားမှု အားကောင်းပြီး အကောင်းအဆိုးကို သိမြင် ခွဲခြား နိုင်စွမ်း ရှိသူတွေလို့ ဆိုပါတယ်။ ဒါ့အပြင် သူတို့ဟာ ဝိညာဉ်တွေနဲ့လည်း ဆက်သွယ်နိုင်စွမ်းပြီး စိတ်စွမ်းအင်လည်း ကောင်းမွန်ကြပါတယ်။ စိတ်ရှည် သည်းခံတတ်ကြပြီး ဖြစ်ပျက်သမျှကိုလည်း တရားသဘောနဲ့ ရှုမြင် နိုင်ကြသူတွေ ဖြစ်တယ်လို့ ဆိုပါတယ်။